trlat_Confessiones_III168_73

Et ea fiunt, cum tu derelinqueris, fons vitae , qui es unus et verus creator et rector universitatis, et privata superbia diligitur in parte, unum falsum. Itaque pietate humili reditur in te, et purgas nos a consuetudine mala et propitius es peccatis  confitentium et exaudis gemitus compeditorum  et solvis a vinculis, quae nobis fecimus, si iam non erigamus adversum te cornua  falsae libertatis avaritia plus habendi et damno totum amittendi, amplius amando proprium nostrum quam te, omnium bonum.